Job 24

1 Dahme Koht sohte ketin koasoanehdihki ehu ahnsoun kopwung,
ehu rahn en kopwung ong irail kan me kin papah?

2 Aramas akan kin kamwakid arail pehs kan pwe re en kalaudehla sapwarail;
re kin pirapahda sihpw kan oh kesehlong mpen neirail pelinmen kan.
3 Re kin kihsang nein me sepwoupwou kan ahs akan,
oh kin kolokol nein liohdi kou lao liohdio pwainla eh pweipwand kan.
4 Re kin katokihedi en me semwehmwe kan ar pwung,
oh idingohng me paisuwed kan en tang oh rukula.

5 Eri me semwehmwe kan, duwehla ahs akan,
me kin raparapahki kisin mwenge nan sapwtehn madekeng kan;
solahr wasa re kak diar ie kenen neirail seri kan mwenge.
6 Re kin koadoahkih mwaht akan me kaidehn arail, ^{▼▼ MWAHT AKAN ME KAIDEHN ARAIL: Sapwen me semwehmwe kan kin kohsang irail ni tiahk en mwersuwed, irail ahpw kin uhd idihdohng re en doadoahkohng meteikan oh ale pweipwei tikitik.}
oh rikirik kreip nan en aramas suwed mwetin wain kan.
7 Re kin meirla nipwong sohte upuhp,
sohte mehkot me re kak perehkihsang irail lemwulemwur.
8 Re kin wusekesengkihla keteu sang pohn nahna kan,
re ahpw kin rukula oh kospene pahn paip akan.

9 Aramas suwed kan kin kaliduwih seri sepwoupwou kan
oh kihsang nein aramas semwehmwe kan seri pwehn kapwungkihla pweipwand.
10 Ahpw me semwehmwe kan kin kohkohseli sohte likou mehn pere irail;
re kin duhpekla ni ar kin dundolung wahn pilawa.
11 Re kin tiak wahn olip wiahkihda leh,
oh kreip wiahkihda wain,
ahpw pein irail kin men nimpilda.
12 Nan kahnimw kan me soahn oh me pahn melahr akan kin wie weriwer,
ahpw Koht kin ketin pohnsehse arail kapakap akan.

13 Mie aramas me kin soikala marain;
re sohte wehwehki oh sohte men kohla wasa me maraino pahn kahluwairaillahng ie.
14 Sounkam aramas kin pwourda ninsohrahn
oh kohieila kemehla me semwehmwe kan,
oh nipwong eh kin pirap.
15 Me kin kamwahl akan kin awiawih rotorot en pwohng en leledo;
e kin ekihla mese pwe emen en dehr kilang.
16 Sounpirap akan kin wahdpeseng ihmw akan nipwong,
ahpw ni eh kin rahnpeseng re kin rukusang marain.
17 Re kin masak marain en rahn,
ahpw re sohte kin masak rotorot.
Sopahr

18 Lapake kin kapeila aramas suwed,
oh sapwe kin mihla pahn sapwellimen Koht keria;
e solahr kin kohla doadoahk nan eh mwetin wain kan.
19 Nin duwen sinoh eh kin sohrala pahn ketipin oh karakar,
iei duwen me dipan emen eh kin sohrasang nan sapwen me momour kan.
20 Ine pil kin sohla tamataman ih met;
mwahs kin kangala oh kauwehla duwehte tuhke me pwupwudier.
21 Met pweidahr pwehki eh wiakauwe liohdi kan
oh sohte kesempwalki lih depwen kan.
22 Koht, nan sapwellime roson, kin ketin kamwomwala me lapalap akan;
Koht kin ketin mwekid—oh aramas suwed akan kin mehla.
23 Mweinele Koht pahn kak ketin mweidohng en nsenamwahu,
ahpw e kin ketin mwasamwasahn ahnsou koaros.
24 Aramas suwed men kin paiamwahu ahnsou kis,
ahpw mwuhr e kin mengila rasehng dihpw,
rasehng kohn pwoat me lupdier.
25 Mie emen me kak kamahmkihla me met sohte mehlel?
Mie me kak kadehdehda me ei lokaia kan sohte mehlel?